অপেক্ষাৰ অন্য নাম সঞ্জু চেমছন
-+++++++++–
সঞ্জু চেমছনৰ যাত্ৰা কেৱল এজন ক্রিকেটাৰৰ কাহিনী নহয়, এয়া হৈছে অপাৰ ধৈৰ্য্য আৰু এক নিৰৱ সংগ্ৰামৰ গাঁঠা। ছবিখনত তেওঁৰ চকুৰ পানী আৰু ওপৰলৈ চাই কৰা প্ৰাৰ্থনাই বহুত কিবাকিবি কৈ যায়…
ক্ৰিকেটৰ পথাৰত কেতিয়াবা প্রতিভাই শেষ কথা নহয়, কেতিয়াবা ভাগ্য আৰু সময়ৰো খেল থাকে। সঞ্জু চেমছন তাৰেই এক জীৱন্ত উদাহৰণ। এজন বেটছমেন যাৰ বেটিঙত ক্লাছ আছে, যাৰ শ্বটবোৰত ৰাজকীয়তা আছে, অথচ যাৰ বাবে ভাৰতীয় দলৰ নীলা জাৰ্চীটো পিন্ধিবলৈ বছৰৰ পাছত বছৰ ধৰি কেৱল অপেক্ষা কৰিবলগীয়া হৈছে।
বহুতো সুযোগ আহিল আৰু গ’ল। কেতিয়াবা তেওঁ ব্যর্থ হ’ল, আৰু কেতিয়াবা ভাল খেলিও দলৰ পৰা বাহিৰ হ’বলগীয়া হ’ল। ছ’চিয়েল মিডিয়াত তেওঁক লৈ হাজাৰ বিতৰ্ক, অনুৰাগীৰ ক্ষোভ- কিন্তু এই সকলোবোৰৰ মাজত সঞ্জু আছিল একেবাৰেই মৌন। তেওঁ কেতিয়াও কোনো ওজৰ-আপত্তি কৰা নাছিল, কেৱল হাঁহি মুখে সকলো সহ্য কৰি গৈছিল।
ছবিখনত থকা সেই শাৰীটোৱে সঁচাকৈয়ে হৃদয় চুই যায়-“শেষত গৈ ভগৱানে যি কৰে ভালেই কৰে।” বহু বছৰৰ বঞ্চিত হোৱাৰ বেদনা, দলত স্থান নোপোৱাৰ দুখ আৰু প্ৰতিটো ইনিংছতে নিজক প্ৰমাণ কৰাৰ যি মানসিক চাপ, সেই সকলোবোৰৰ উত্তৰ আছিল তেওঁৰ শেহতীয়া সুন্দৰ প্ৰদৰ্শনসমূহ।” তেওঁৰ চকুৰ পানী দুৰ্বলতাৰ নহয়, সেইয়া আছিল ইমান দিনে বুকুত সাঁচি ৰখা প্রতীক্ষাৰ এক বিৰল বহিঃপ্রকাশ।”
শেষত এটাই কথা… সঞ্জু চেমছনৰ পৰা এটা কথা শিকিবলগীয়া যে, পৃথিৱীয়ে আপোনাক যিয়েই নকওক কিয়, আপুনি মাথোঁ নিজৰ কাম কৰি যাওক। সময় এদিন সলনি হ’বই। আজি যেতিয়া তেওঁ ফিল্ডত ১০০ ৰাণ কৰি চকুহাল বন্ধ কৰি ওপৰলৈ চাই ঈশ্বৰক ধন্যবাদ দিয়ে, তেতিয়া বুজা যায় যে সেই সফলতাতকৈ অধিক আছিল তেওঁৰ আত্মতৃপ্তি।
সৌজন্য -ধনঞ্জয় সূত্ৰধৰ