বৰ্ণাঢ্য লোক কৃষ্টি-সংস্কৃতিৰে সমৃদ্ধ মধ্য অসমৰ তিৱা সকলৰ বসন্ত কালত এক কৃষি কেন্দ্ৰিক উৎসৱ হৈছে ছগ্ৰা উৎসৱ । প্ৰধানকৈ ফাগুন-চ’ত মাহত শিমলু, মদাৰ ফুল ফুলাৰ সময়ত এই উৎসৱ পালন কৰা হয় । পূৰ্বপুৰুষ সকলৰ পৰা মানি অহা জনবিশ্বাস অনুসৰি এই ছগ্ৰা পূজা বা ছগ্ৰা উৎসৱ পালন নকৰা পৰ্যন্ত তিৱা কৃষিজীৱী লোক সকলে পথাৰত হাল নাবাই বা মাটি চহ নকৰে। একেদৰে এই উৎসৱ সমাপন কৰিহে তেওঁ লোকে পথাৰত আহু বা বাও ধানৰ বীজ সিঁচাৰ নিয়ম । আনকি তেওঁলোকে এই ছগ্ৰা উৎসৱ পালন নকৰাকৈ বাৰীৰ তামোল পৰ্যন্ত নাখায় । আনহাতে গোভা দেউৰজাৰ ঐতিহাসিক জোনবিল মেলাৰ লগত বিশেষ সম্পৰ্কিত এই উৎসৱত জোনবিল মেলাৰ পৰা বিনিময় কৰি অনা কেঁচা মাছ শুকুৱাই ৰাখি এই ছগ্ৰা পূজাত ব্যৱহাৰ কৰে । এই পূজাত কোনো ধৰণৰ বলি বিধান আদি দিয়া নহয় । উল্লেখযোগ্য যে তিৱা সকলৰ নিৰ্দিষ্ট ফৈদৰ লোক সকলেহে এই ছগ্ৰা উৎসৱ পালন কৰা দেখা যায় । পোনপ্ৰথমে পশ্চিম কাৰ্বি আংলং আৰু মেঘালয়ৰ ৰিভয় জিলাৰ আমচাই, মাৰ্জুং , আমজং আৰু লুংফুইপিনং অঞ্চলত এই ছগ্ৰা উৎসৱ পালন কৰাৰ পিছত উত্তৰ পূৰ্বাঞ্চলৰ অন্যান্য অঞ্চলত বসবাস কৰা তিৱা সকলে এই ফাগুন চ’ত মাহত এই উৎসৱ পালন কৰে । বিগত বৰ্ষ সমূহৰ দৰেই এইবেলিও
মধ্য অসমৰ জাগীৰোডৰ ডাবৰঘাটত ডাবৰঘাট চামাদি পৰিচালনা সমিতিৰ উদ্যোগত চাৰিদিনীয়া কাৰ্যসূচীৰে অনুষ্ঠিত কৰা এই ছগ্ৰা উৎসৱত গাঁৱৰ মূৰব্বী সকলে পূজা পাৰ্বন আগবঢ়োৱাৰ পিছত গাঁৱৰ যুৱক-যুৱতী তথা শিল্পী দলসমূহে তেওঁ লোকৰ পৰম্পৰাগত সাজ-পোছাক পৰিধান কৰি পিছতুৰিমা মিছৱা, ছগ্ৰা মিছৱা আদি কৃষিভিত্তিক বিভিন্ন নৃত্য-গীত পৰিৱেশন কৰে। উল্লেখযোগ্য যে ইয়াৰ লগত সংগতি ৰাখি কালি উদ্যোক্তা সকলে অসমীয়াৰ প্ৰাণৰ শিল্পী জুবিন গাৰ্গৰ সোঁৱৰণত উৎসৱ স্থলীত নাহৰ গছৰ পুলি ৰোপণ কৰে। এই নাহৰ পুলি ৰোপন কাৰ্যসূচী শুভাৰম্ভ কৰে ডাবৰঘাটৰ অৱসৰপ্ৰাপ্ত শিক্ষক জিৰমল পাতৰে । সমান্তৰাল ভাৱে হাৰ্টথ্ৰ’ব জুবিন গাৰ্গৰ প্ৰতিচ্ছবিত মাল্যাৰ্পণ আৰু শ্ৰদ্ধাঞ্জলি জ্ঞাপন কৰে সদৌ অসম তিৱা ছাত্ৰ সন্থাৰ সভাপতি প্ৰশান্ত মচৰঙে । এই কাৰ্যসূচীত অন্যান্য বিষয়ববীয়া সকলেও অংশগ্ৰহণ কৰে । একেদৰে জুবিন গাৰ্গৰ সোঁৱৰণত উচ্ছৰ্গা কৰাৰ উদ্দেশ্যে স্থায়ীভাৱে নিৰ্মাণ কৰা তিৱা সকলৰ পৰম্পৰাগত ন’বাৰ অৰ্থাৎ বৰঘৰ উদ্বোধন কৰে তিৱা ছাত্ৰ সন্থাৰ মুখ্য উপদেষ্টা ৰিমল আমচিয়ে । বৰঘৰ উদ্বোধন কৰি তিৱা নেতা আমচিয়ে তিৱা সকলৰ সংগীত নিৰ্মাণৰ ক্ষেত্ৰত জুবিন গাৰ্গৰ বহুমূলীয়া অৱদানৰ বিষয়ে উল্লেখ কৰে । এই অনুষ্ঠানত তিৱা ছাত্ৰ সন্থাৰ আন এগৰাকী উপদেষ্টা প্ৰহ্লাদ মচৰং উপস্থিত থাকি কয় যে নানা জাতি উপজাতিৰে পৰিপুষ্ট আমি সকলোৱে অসমীয়া । কিন্তু বহু সময়ত একাংশ লোকে নিজকে তিৱা , বড়ো, কাৰ্বি, ডিমাছা, আহোম, মটক, কোচ ৰাজবংশী বুলি পৰিচয় দিহে ভাল পায় । তেওঁ লগতে কয় যে বহু সময়ত বহুতৰে ধৰ্মীয় বিশ্বাস, উপাসনা পদ্ধতি পৃথক হ’ব পাৰে, কিন্তু ইয়াৰ মাজতে আমি বৃহত্তৰ অসমীয়া জাতিটোক বচাই ৰাখিব লাগিব । তিৱা ছাত্ৰ সন্থাৰ উপদেষ্টা প্ৰহ্লাদ মচৰঙে অসম চৰকাৰক আহ্বান জনাই কয় যে যি দৰে বিহুনাচ , বাগৰুম্বাক বিশ্ব দৰবাৰলৈ লৈ যোৱা হৈছে ঠিক একেদৰে তিৱা সকলৰ লাংখুন নৃত্যক বিশ্ব বাসীৰ সমুখত পৰিচয় কৰাই তিৱা সকলৰ চহকী সাংস্কৃতিক আগবঢ়াই নিবলৈ চৰকাৰক আহ্বান জনায় । এই ক্ষেত্ৰত তেওঁ তিৱা স্বায়ত্ত শাসিত পৰিষদক গুৰুত্বপূৰ্ণ ভূমিকা গ্ৰহণ কৰিবলৈকো আহ্বান জনায়। অনুষ্ঠানত তিৱা ছাত্ৰ সন্থাৰ সাধাৰণ সম্পাদক তৰুণ মাদাৰ, অন্যান্য বিষয়ববীয়া বিদ্যা মিঠি, কন্দৰ্প হুকাই , প্ৰবীণ মিঠি, স্থানীয় বয়োজ্যেষ্ঠ ব্যক্তি সকল উপস্থিত থাকে ।
