assam

শিৱ। জগতৰ পালনকৰ্তা। কৈলাশৰ অধিপতি। তেত্ৰিশ কৌটি দেৱতাৰ ভিতৰত অতি সহজে সন্তুষ্ট হোৱা দেৱতা। আপোনভোলা। ভোলানাথ ৰূপে পূজিত। সংসাৰৰ প্ৰতি যেন ক’ৰবাত উদাসীন। সেয়ে হয়তো ৰজা যক্ষই যজ্ঞলৈ জনোৱা নাছিল আমন্ত্ৰণ। পৰিণতি ? সতীৰ আত্মাহুতি। সতীৰ দেহ লৈ শিৱৰ ব্ৰহ্মাণ্ড ভ্ৰমণ। সদাশিৱই হঠাতে যেন ধাৰণ কৰিছিল ৰুদ্ৰ ৰূপ। প্ৰেমিক শিৱ হৈছিল সংহাৰী। সেয়ে শিৱ হোৱা জানো সহজ ? উদাসীন হৈয়ো হ’ব লাগিব দুৰ্দান্ত প্ৰেমিক। আপোনাভোলা হৈয়ো কৰিব লাগিব চৰম ত্যাগ। আৰু নীলকণ্ঠ ? সাগৰ মন্থনত ওলোৱা বিশ্বৰ বাবে ক্ষতিকাৰক বিষো জানো পান কৰা নাছিল।

সময় বাগৰিল। সৰ্বত্ৰে মহাশিৱৰাত্ৰি উদ্ যাপন। পিছে শিৱৰাত্ৰিৰ নামত চলে কি ? বাবাৰ প্ৰসাদ বুলি মাত্ৰাধিক ভাং খাই ভণ্ডামী কৰে একাংশই। আধ্যাত্মিক প্ৰেমক উপলদ্ধি নকৰে। শিৱৰ ত্যাগ অনুধাৱন নকৰাকৈ শিৱৰাত্ৰি উদ্ যাপন কৰে তথাকথিত একাংশ ভক্তই । কেৱল সিমানেই নহয় মদ- ভাং খাই পৰিৱেশ বিনষ্ট কৰাৰ লগতে অপ্ৰীতিকৰ পৰিৱেশো সৃষ্টি কৰে। একেদৰে শাওণ মাহত একাংশই শিৱৰ আৰাধনাৰ নামত যিটো পৰিৱেশ ৰচনা কৰে ,তেনে পৰিৱেশ অসম মুলুকত বিগত ৫ বছৰৰ পূৰ্বে পৰিলক্ষিত হোৱা নাছিল।

সি যি কি নহওক, আমি পূৰ্বে উল্লেখ কৰিছোঁ শিৱ দুৰ্দান্ত প্ৰেমিক। যুগে যুগে এগৰাকীকে ভাল পাব পৰাটো জানো ইমান সহজ ? আমাৰ একাংশই আকৌ পশ্চিমীয়া সংস্কৃতিক অনুসৰণ কৰি সাপ্তাহিক কাৰ্যসূচীৰে প্ৰেমৰ দিন উদ্ যাপন কৰে । হৰ- গৌৰীৰ প্ৰেম জানো আদৰ্শ- অমল প্ৰেম নহয় ? এনে নিভাঁজ প্ৰেমৰ বন্দনা জানো হোৱা অনুচিত ?

মহাশিৱৰাত্ৰিতে সকলোৱে গভীৰভাৱে উপলব্ধি কৰক শিৱৰ ত্যাগ,শিৱৰ প্ৰেম। আধ্যাত্মিক চেতনাই সজীৱ কৰক নতুন প্ৰজন্মক।